Publikimet më të fundit të Eurostat, lidhur me të ardhurat në shtetet e Europës, tregojnë një tablo aspak pozitive në lidhje me ekonominë dhe mirëqënien e banorëve në vendin tonë. Shqipëria renditet e fundit në Europë për të ardhurat dhe konsumin për frymë, në raport me mesataren e Bashkimit Europian referuar vitit 2020. Por nga ana tjetër edhe pse niveli i të ardhurave paraqitet i ulët, niveli i çmimeve të mallrave është ndër më të lartat në rajon, duke vështirësuar përballimin e jetesës mesatare nga ana e qytetarëve shqiptarë. Sipas të dhënave të Eurostat, Prodhimi i Brendshëm Bruto për Frymë në Shqipëri ishte sa 31 për qind e mesatares së Bashkimit Europian në vitin 2020. Në rajon progresin më të madh lidhur me të ardhurat për frymë e ka arritur Serbia, të ardhurat e së cilës ishin sa 43 për qind e mesatares së Bashkimit Europian. Edhe pse të ardhurat për frymë arrijnë nivele të ulta krahasimisht me vendet e Europës, niveli i çmimeve në Shqipëri është ndër më të lartat në rajon. Çmimet e ushqimeve afrohen me mesataren e Europës. Eurostat përllogariti se më 2020 çmimet e artikujve ushqimore në Shqipëri ishin sa 83.4 për qind e mesatares së Bashkimit Europës. Çmimet më të larta në vendin tone i kanë shërbimet e transportit dhe komunikimit, të cilat arrijnë një nivel mbi mesataren e Bashkimit Europian.