Kryeministri i Kosovës, Albin Kurti e konsideroi padrejtësi të papranueshme dënimin me 81 vite burg të katër udhëheqësve të Ushtrisë Çlirimtare të Kosovës nga gjykata speciale e Hagës. Përmes një video-mesazhi të ndarë në rrjetet sociale, Kurti thotë se vendimi është produkt i një institucioni të ngritur mbi gënjeshtra dhe shpifje dhe se ai duhet të korrigjohet në apel. - Aktgjykimi mund të jetë shqiptuar formalisht në emër të popullit të Kosovës, por kjo formulë e zbrazët nuk duhet ngatërruar me vullnetin e popullit. Ky aktgjykim patjetër duhet ndryshuar dhe korrigjuar në shkallën e apelit dhe atë sa më parë. Në këto momente të vështira, jemi pranë familjeve të ish krerëve të UÇK-së dhe të gjithë bashkëluftëtarëve çlirimtarë. Siç e dimë, me akuzat në Këshillin e Evropës nga deputeti rus Konstantin Kosaçev dhe ai serb Millosh Alligrudiq filloi gjithçka më 15 prill 2008, por ne duhet të sigurohemi që asgjë nuk përfundoi sot më 16 shtator 2026. Asgjë prej pretendimeve e akuzave të ekzagjeruara e absurde mbi të cilat është arsyetuar ngritja e Dhomave të Specializuara, duke nisur prej Shtëpisë së Verdhë e trafikimit të organeve, nuk ka mundur të ngritej nga vetë Prokuroria, për shkak të mungesës së provave.