Pas vendimit të dhënë nga Gjykata Administrative, ka reaguar avokati mbrojtës i Veliajt, Plarent Ndreca i cili e cilëson të pabazë vendimin trupit gjykues duke nëvizuar se ajo nuk hyri në themelin e pretendimeve të ngritura nga kryebashkiaku kundër prokurorit Ols Dado. Gjykata nuk hyri në themelin e pretendimeve tona. Ajo na mohoi aksesin efektiv në gjykatë, me argumentin se Erion Veliaj dhe Bashkia Tiranë nuk kanë interes të ligjshëm të kërkojnë kontrollin e ligjshmërisë së emërimit të një funksionari shtetëror, i cili ka ndërhyrë drejtpërdrejt mbi të drejtat e tyre kushtetuese. Po nëse nuk ka interes të ligjshëm personi ndaj të cilit janë ushtruar përgjime, kontrolle, sekuestrime, masa sigurimi dhe kufizime të lirisë personale, atëherë kush e ka? Nëse nuk legjitimohet qytetari që pretendon se këto masa janë marrë nga një person pa atributet ligjore për t'i ushtruar ato, atëherë praktikisht nuk legjitimohet askush. Sipas Ndrecës, logjika e këtij vendimi çon në pasoja absurde.