John Bolton, i cili shërbeu si këshilltar i sigurisë kombëtare i Donald Trump përpara se të bëhej një kritik i zëshëm i presidentit, është vënë nën akuza federale. Departamenti i Drejtësisë i paraqiti çështjen një jurie të madhe në Maryland të enjten, dhe ajo ra dakord se kishte prova të mjaftueshme për të paditur Boltonin, i cili lëshoi një deklaratë duke mbrojtur pafajësinë e tij. Kjo vjen pasi agjentët e FBI-së kontrolluan shtëpinë dhe zyrën e Boltonit në gusht si pjesë e një hetimi mbi trajtimin e informacionit të klasifikuar. Aktakuza e bën Boltonin, 76 vjeç, të tretin nga kundërshtarët politikë të presidentit amerikan që përballet me akuza në javët e fundit. Ai mund të përballet me dekada burg. Sipas një aktakuze prej 26 faqesh të paraqitur në një gjykatë në Greenbelt të Marylandit, të enjten, mbi Bolton rëndojnë tetë akuza për nxjerrje të informacionit të mbrojtjes kombëtare dhe 10 akuza për mbajtje të paligjshme të këtyre informacioneve.