Shtatë oficerë të skualifikuar në garën për Byronë Kombëtare të Hetimit, e njohur ndryshe si “FBI-ja shqiptare” kanë kallëzuar penalisht Komisionin e Vlerësimit që përzgjedh hetuesit e byrosë. Dritan Prenci, Enkelejda Millonai, Vladimir Mara, kryeprokurori i SPAK-ut, Arben Kraja, si dhe drejtoresha e BKH-së, Aida Hajnaj janë kallëzuar për shpërdorim detyre, manipulim dhe falsifikim dokumentesh. Të skualifikuarit kanë konstatuar manipulim të procesit në të gjitha hallkat e vlerësimit. “Nuk kemi gjetur asnjë sqarim nga drejtuesit e procesit. E shkarkojnë përgjegjësinë te monitoruesit ndërkombëtarë. Kërkojmë vënien para përgjegjësisë të këtyre personave sa më shpejt”, shprehen ata. Ndërkohë një ditë më parë, disa aplikantë të skualifikuar nga gara kanë bërë një padi për procesin dhe kërkuan pezullimin e tij. Ata kanë njoftuar edhe Shtetet e Bashkuara të Amerikës dhe Bashkimin Evropian, ndërsa u shprehën se janë eliminuar padrejtësisht. Ata kërkojnë që të mos ndërmerret asnjë vendim, derisa të shprehet gjykata. Ndërkohë, në padi shkruajnë se eliminimi ka ardhur për mungesë të transparencës dhe se nuk ishte përcaktuar minimumi i kapjes së normave nga kandidatët.