Hendeku i pabarazisë mes qytetarëve është thelluar edhe tek depozitat në bankë. Sipas të dhënave nga Banka e Shqipërisë, në fund të vitit 2023 dhjetë depozituesit më të mëdhenj në fund të vitit zotëronin më shumë se 8% të totalit të depozitave bankare. Sipas Monitor, një tendencë e ngjashme vërehet edhe për grupet e tjera të depozituesve të mëdhenj. 20 depozituesit më të mëdhenj në fund të vitit të kaluar zotëronin 10.5% të depozitave. 8 % e depozitave totale në fund të vitit 2023 do të përkthehej në një vlerë prej rreth 1.2 miliardë eurosh në llogaritë e 10 depozituesve më të mëdhenj. Për 50 depozituesit më të mëdhenj, vlera e depozitave bankare totale llogaritet në rreth 2.2 miliardë euro, në rritje me 16.3% krahasuar me një vit më parë. Krahasimisht me vitin 2022, gjendja e depozitave të 10 depozituesve më të mëdhenj u rrit me 7.4 miliardë lekë. Rritja e peshës së depozituesve më të mëdhenj duket se përputhet me tendencën e rritjes së shpejtë të depozitave të biznesit në tërësi. Rritja e depozitave të biznesit është një tendencë e dukshme e viteve të fundit, që ka marrë një hov të shpejtë veçanërisht pas pandemisë.