Rinumërimi në Durrës nuk solli surpriza. Hapja e kutive tregoi se në favor të Partisë Demokratike ishin llogaritur 18 vota të pamerituara, të cilat do i hiqen; ndërsa Partia Socialiste kishte fituar pesë vota padrejtësisht. Kandidatit të Partisë Socialiste, Arkend Balla do i hiqen 55 vota, të cilat rezultuan se ishin llogaritur gabim nga numërimi fillestar pas zgjedhjeve të 11 majit. Nga radhët e Partisë Demokratike, Aulon Kalaja nuk arriti të fitonte mandat deputeti. Rinumërimi i shtoi atij 12 vota, por që patën një ndikim të papërfillshëm në shpërndarjen e mandateve. Ndërkohë ish prokurorit Arjan Ndojës iu hoqën 86 vota të cilat i ishin llogaritur padrejtësisht në numërimin fillestar. Durrësi përmbylli procesin e rinumërimit, i cili në tërësi nuk pati ndryshime në shpërndarjen e mandateve mes subjekteve politike garuese në parlamentaret e 11 majit, por tregoi për trafikim votash mes kandidatëve të listës së hapur të të njëjtin subjekt politik. Problematikë që ishte më e theksuar në qarkun e Fierit. Rezultati përfundimtar i zgjedhjeve nuk është shpallur ende në qarqet e Tiranës, Durrësit, Fierit dhe Elbasanit. Komisioni i Ankimimeve dhe Sanksioneve do të ketë seacna publike më 7 korrik për këto qarqe, për të vendosur nëse do të quhen të vlefshme zgjedhjet. Hallka e fundit për ankimim për Partinë Demokratike është Kolegji Zgjedhor.