Shtëpia e Bardhë ka lëshuar një paralajmërim të hënën se fondet e planifikuara për Ukrainën do të përfundojnë në fund të vitit dhe se presidenti rus, Vladimir Putin mund ta fitojë luftën, nëse Kongresi nuk miraton fonde të reja. Shefja e Zyrës së SHBA-së për Buxhet, Shalanda Young, tha në një letër dërguar udhëheqësit të Dhomës së Përfaqësuesve, Mike Johnson që, nëse ndihma ushtarake përfundon, atëherë Kievi do të gjunjëzohet ndaj pushtimit rus. Presidenti amerikan, Joe Biden, demokrat, i ka kërkuar Kongresit në tetor që të miratojë një pako ndihme në vlerë të 106 miliardë dollarëve për Ukrainën dhe Izraelin, mirëpo kongresistët janë të ndarë. “Nuk ekziston një shportë magjike me fonde në këtë moment. Ne nuk kemi para, dhe gati as kohë”, ka shkruar Young. “Mosdërgimi i armëve amerikane dhe pajisjeve tjera, do ta gjunjëzojë Ukrainën në fushëbetejë, duke vënë në rrezik jo vetëm avancimet ukrainase, por duke e rritur mundësinë për fitore ushtarake ruse”.