Pas ndalimit të kamerave në seancat gjyqësore, Gjykata e Posaçme vendos të kufizojë edhe aksesin e gazetarëve. GJKKO njoftoi për hyrjen në fuqi të rregullores së re të brendshme, ku dy janë elementët që cenojnë rëndë punën e medias në pasqyrimin në kohë reale të zhvillimeve në seancat gjyqësore. Sipas vendimit, gazetarëve nuk do t’u lejohet telefoni brenda sallave në proceset gjyqësore, duke pamundësuar dërgimin e informacioneve në redaksitë përkatëse në kohë reale. Jo vetëm kaq, por me arsyetimin e mungesës së kapaciteteve nëpër salla, Gjykata e Posaçme ka vendosur edhe të kufizojë numrin e gazetarëve që mund të ndjekin një seancë gjyqësore. Më konkretisht, GJKKO thotë se në praktikë mund të krijohen situata kur kapaciteti i sallës së gjykimit, kërkesat e sigurisë, mbrojtja e pjesëmarrësve në proces ose interesi i lartë publik nuk lejojnë praninë e pakufizuar të përfaqësuesve të medias. Për këtë arsye, sipas rregullores së re, gazetarët që duan të ndjekin një seancë të caktuar gjyqësore duhet që të plotësojnë një formular-kërkesë, që më pas është në dorë të gjykatës ta pranojë, apo ta refuzojë atë. Cenimi i punës së medias përkeqësohet edhe më tej, pasi gjykata mund të vendosë të mos lejojë gazetarët jo vetëm me arsyetimin e tejmbushjes së sallës, por edhe me arsyetimin evaziv të sigurisë. Në lidhje me këtë rregullore ka reaguar Asociacioni i Gazetarëve të Shqipërisë, që thotë se ajo cenon rëndë punën e medias dhe kërkon nga GJKKO të mos e zbatojë atë nga data 1 shtator.