Operatori i Sistemit të Shpërndarjes ka ulur me rreth 63 milionë euro planin e investimeve për vitet 2026 dhe 2027, me pjesën më të madhe të reduktimit të përqendruar për vitin e ardhshëm. Reduktimi është njoftuar përmes dokumenteve që kompania ka depozituar te Enti Rregullator i Energjisë. Sipas revistës Monitor, plani i rishikuar parashikon tkurrje të investimeve me rreth 6.5 milionë euro për vitin aktual dhe të gati 57 milionë euro për vitin 2027. OSSH thotë në dokumentin që i ka dorëzuar Entit se rishikimi është pjesë e procesit normal të përditësimit të planit pesëvjeçar të zhvillimit të rrjetit të shpërndarjes për periudhën 2023-2027 dhe synon ta përshtatë programin e investimeve me ecurinë reale të projekteve dhe me mundësinë e zbatimit të tyre. Sipas operatorit, ndryshimi i shumës totale lidhet kryesisht me rishikimin e vlerave të projekteve ekzistuese, përfshirjen e projekteve të reja, zhvendosjen e disa investimeve në kohë dhe kursimet e krijuara gjatë procedurave të prokurimit.