Pas dorëzimit të kërkesës së dekretit të presidentes Vjosa Osmani për shpërndarjen e Kuvendit në Gjykatën Kushtetuese për vlerësimin e kushtetutshmërisë, Presidenca ka bërë me dije se Osmani ende nuk e ka ka nënshkruar dekretin për datën e zgjedhjeve. Presidenca është shprehur se Vjosa Osmani, është ende në pritje të vendimit të Gjykatës Kushtetuese, nëse kjo e fundit e vlerëson si të nevojshme caktimin e një mase të përkohshme. Presidenca ka sqaruar se në takimin konsultativ me partitë politike është bërë e qartë se çdo hap i mëtejshëm në caktimin e datës së zgjedhjeve do të bëhet pas vlerësimit të Gjykatës Kushtetuese. “Nëse Gjykata Kushtetuese e vlerëson si të nevojshme caktimin e një mase të përkohshme, Presidenca e mirëpret atë, duke ritheksuar se masa në asnjë moment nuk paragjykon vendimin përfundimtar të Gjykatës lidhur me kushtetutshmërinë e dekretit,” ka njoftuar presidenca. Vetëvendosje kërkoi këtë të hënë nga Gjykata Kushtetuese që të vendosë masë të përkohshme për pezullimin e këtij dekretit për shpërndarjen e Parlamentit, deri në nxjerrjen e aktgjykimit përfundimtar.