Presidentja Vjosa Osmani ka theksuar se Kosova i bashkohet qëndrimit të Sekretarit të Shtetit të SHBA-së, Marco Rubio, duke shprehur mbështetje të plotë për integritetin dhe sovranitetin territorial të Bosnjës dhe Hercegovinës. Osmani ka dënuar veprimet që dëmton themelet e Bosnjës dhe Hercegovinës, duke theksuar se kërcënimi ndaj këtij integriteti mund të rrezikojë paqen dhe stabilitetin, të cilat janë arritur pas shumë sakrificave dhe me mbështetje të qëndrueshme nga SHBA-të. Sekretari amerikan i Shtetit, Rubio, ka deklaruar se veprimet e presidentit të Republikës Sërpska, Millorad Dodik, paraqesin një kërcënim për sigurinë dhe stabilitetin e Bosnjës dhe Hercegovinës dhe dëmtojnë institucionet e saj shtetërore. Më 5 mars, Dodik dekretoi ligje që ndalojnë punën e institucioneve shtetërore të Bosnjës në Republikën Sërpska, duke përfshirë Gjykatën, Prokurorinë dhe Agjencinë Shtetërore të Hetimeve. Më 7 mars, Gjykata Kushtetuese e Bosnjës shpalli këto ligje jokushtetuese dhe i pezulloi ato përkohësisht, me pritshmërinë për një ndalim të përhershëm pas një shqyrtimi të plotë.