“Vendimi i takon deputetëve të Kuvendit”, kështu është shprehur Presidentja e Kosovës, Vjosa Osmani për mediet në vend, teksa ka folur për mundësinë e një mandati të dytë në krye të shtetit. Osmani tha se ka raporte korrekte me shumicën dërrmuese të deputetëve, pa dallim partie, dhe se gatishmërinë për të vazhduar e ka shprehur me vullnet të plotë. “Kur kam thënë që besoj se është në të mirën e Kosovës që të vazhdojmë me punët që kemi filluar, sidomos me afrimin e vendit tonë me ndërkombëtarët…”, është shprehur presidentja. Sipas Osmani, procesi tashmë është në dorën e deputetëve. Ajo tha se pret mbështetje nga të gjithë deputetët dhe partitë që ia duan të mirën Kosovës. E pyetur për raportin me kryeministrin Kurti, Presidentja tha se ka raport të mirë dhe institucional, dhe se bashkëpunojnë për çështje në interes të Kosovës, dhe se kështu do të jetë edhe në vazhdim.