OSBE-ODIHR ka publikuar raportin e saj përfundimtar lidhur me organizimin dhe zhvillimin e zgjedhjeve lokale të 14 majit të këtij viti. Në raport thuhet se zgjedhjet ishin përgjithësisht të mirëadministruara dhe të zhvilluara me pjesëmarrjen e forcave kryesore politike, por procesi u karakterizua nga polarizimi i vazhdueshëm midis partive kryesore politike dhe një ndarje e thellë brenda opozitës. “Rastet e keqpërdorimit të burimeve shtetërore në nivelet qendrore dhe lokale, pretendimet për presion mbi punonjësit e sektorit publik dhe votuesit, dhe pretendimet për blerje votash ishin shqetësuese”, theksohet në raportin e OSBE-së. Sa i takon ditës së zgjedhjeve, OSBE thotë se ishte përgjithësisht paqësore, procesi u ndikua negativisht nga raste të shumta të ndërhyrjeve partiake si dhe nga problemet teknike dhe procedurale, votimi i gjerë në grup dhe problemet me fshehtësinë e votës. Ndërkohë procesi i numërimit, vlerësohet si pozitiv në përgjithësi. Në raportin për zgjedhjet vendore 2023, i publikuar nga Zyra e OSBE-së për Institucionet Demokratike dhe të Drejtat e Njeriut, jepen gjithashtu një sërë rekomandimesh për zgjedhjet në Shqipëri në përputhje me angazhimet e OSBE-së dhe standardet e tjera ndërkombëtare për zgjedhje demokratike.