Prokuroria ka kërkuar dënim maksimal me burgim të përjetshëm për Naim Murselin, dhe dy të akuzuarit e tjerë Granit Plavën dhe Kushtrim Kokallën, në rastin e vrasjes së Liridona Ademajt. Sipas prokurores Perlinçeviç, është vërtetuar se Naim Murseli ka vepruar për përfitim financiar apo moral, duke simuluar një grabitje në të cilën viktima është trajtuar si “dëm kolateral”, ndërsa sipas pretendimeve të aktakuzës, ai ka marrë pjesë në organizimin dhe planifikimin e vrasjes. Në seancë është theksuar se vrasja është kryer nga i akuzuari Granit Plava, i cili ka qëlluar me armë që dyshohet se është siguruar përmes Naim Murselit, ndërsa I akuzuari tjetër Kushtrim Kokalla ka ndërmjetësuar në sigurimin e armës dhe kontaktin mes personave të përfshirë. Në kërkesën përfundimtare, prokuroria i ka propozuar gjykatës shpalljen fajtorë të të akuzuarve, duke vlerësuar se vrasja, mënyra e kryerjes, sjellja pas ngjarjes dhe tentativat për manipulim publik rëndojnë pozitën e tyre. Prokurorja ka kërkuar dënim maksimal i parashikuar për veprën penale “vrasje e rëndë”, respektivisht burgim i përjetshëm.