Thellë nën qytetin verior izraelit të Haifës, ka një spital të madh nëntokësor. Qindra e qindra shtretër janë rreshtuar në të gjitha anët e tij. Ka salla operimi, një maternitet dhe pajisje mjekësore të vendosura nëpër qoshe. Por nuk ka pacientë - ende. Qendra Mjekësore Rambam e ndërtoi këtë spital-bunker pas luftës mes izraelit dhe Hezbollahut, në vitin 2006. Zakonisht ai është një parking shumëkatësh, por mund të shndërrohet në spital në më pak se tre ditë. Ai ka qenë në gatishmëri menjëherë pas sulmeve të Hamasit, më 7 tetor, dhe fushatës ushtarake të Izraelit në Gaza që pasoi. Objekti ka më shumë se 2000 shtretër. Në rast të një sulmi të madh ndaj Izraelit, ai do të merrte pacientët ekzistues nga qendra mjekësore mbi tokëe dhe spitale të tjera përreth. Dhe gjithashtu, ai ka sërish vend për të trajtuar të plagosurit. Ndërsa kërcënimi i një lufte rajonale, gjithëpërfshirëse, duket i madh tani, pas vrasjes së liderit politik të Hamasit, Ismael Haniyeh dhe komandantit të lartë të Hezbollahut, Fuad Shukr javën e kaluar, mjekët në këtë spital thonë se janë të përgatitur për një sulm të madh.