Kryeministri hungarez Viktor Orban tha të premten se nuk ishte në pozicionin e duhur që të negocionte mes Ukrainës dhe Rusisë pas raportimeve të mediave se ai do të udhëtonte në Moskë gjatë ditës për të takuar presidentin rus Vladimir Putin. Orban, një kritik i ndihmës ushtarake perëndimore për Ukrainën, i cili ka marrëdhëniet më të ngrohta me Putinin se çdo lider tjetër i BE-së, tha se fakti që Hungaria aktualisht mban presidencën e rradhës të bllokut nuk i jep atij një mandat për të negociuar në emër të saj. "Unë nuk kam nevojë për një mandat pasi nuk përfaqësoj asgjë," tha Orban në intervistën e tij në radio të premten në mëngjes, pa thënë nëse ai do të udhëtonte për në Moskë më vonë gjatë ditës. "Gjithçka që bëj është të shkoj në vende ku ka një luftë ose kërcënim lufte që kërcënon Bashkimin Evropian dhe Hungarinë, ose ka një pasojë negative mbi ta, dhe të bëj pyetje," shtoi ai. Pas raportimeve të mediave për vizitën e Orban në Moskë, Charles Michel, presidenti i këshillit të BE-së, tha në mediat sociale se "presidenca e rradhës së BE-së nuk ka mandat të angazhohet me Rusinë në emër të BE-së". Agjencitë ruse të lajmeve cituan zëdhënësin e Kremlinit Dmitry Peskov të enjten që as nuk e konfirmoi dhe as nuk e mohoi vizitën. Në fillim të kësaj jave, Orban u takua me presidentin ukrainas Volodymyr Zelenskiy në Kiev dhe i kërkoi atij të konsideronte një armëpushim për të përshpejtuar përfundimin e luftës me Rusinë. Orban tha të premten se ai i kishte bërë Zelenskit "disa pyetje të rëndësishme" për të zbuluar se sa larg ishte Kievi "i gatshëm të shkonte për paqen".