Kryeministri hungarez, Viktor Orban, shpalli të dielën një aleancë të re me Partinë e Lirisë të ekstremit të djathtë të Austrisë dhe partinë kryesore opozitare çeke, me shpresën për të tërhequr partnerë të tjerë dhe të shndërrohet në grupin më të madh të krahut të djathtë në Parlamentin Europian. Kryeministri Orban shkoi në Vjenë për të prezantuar aleancën "Patriotët për Europën" të partisë së tij Fidesz me Partinë e Lirisë dhe partinë ANO të ish-kryeministrit çek Andrej Babish, një ditë përpara se Hungaria të marr presidencën e radhës së Bashkimit Europian. Zgjedhjet e Parlamentit Europian, në fillim të qershorit, forcuan partitë e së djathtës në përgjithësi, megjithëse rezultatet e tyre ndryshonin nga vendi në vend, por lanë paqartësi rreth asaj se deri në çfarë mase do të arrinin të punonin së bashku. Deri më tani, ato janë shpërndarë në dy grupe në përbërjen e re të Parlamentit Evropian, me një numër syresh të paangazhuara. Një "manifest patriotik për një të ardhme europiane" i nënshkruar nga tre udhëheqësit e partive, u kundërvihet planeve të supozuara për "një shtet qendror europian" dhe zotohet "t'i japë përparësi sovranitetit mbi federalizmin, lirisë mbi diktatet dhe paqes”.