Kryeministri i Hungarisë, Viktor Orban, kritikoi Bashkimin Europian ndërsa trumbetoi agjendën e tij nacionaliste gjatë një fjalimi të mbajtur në Rumani, ku diskutoi me homologun e tij rumun për ndërtimin e hekurudhës së re të shpejtë midis Bukureshtit dhe Budapestit si dhe për çështjen e Shengenit. Gjatë fjalimit të mbajtur Orban kundërshtoi politikat e disa vendeve perëndimore që sipas tij, promovojnë të drejtat e grupit LGBTQI. “Nuk ka moral publik në Perëndim. Këtë mund ta shihnit edhe në hapjen e Olimpiadës së Parisit”, tha ai duke iu referuar ceremonisë hapëse. “Për dallim nga liberalët, ne duhet të ngremë një flamur rreth së cilit mund të mblidhen të guximshmit, nacionalistët dhe të krishterët e rinj”, nënvizoi ai ndërsa hodhi akuza dhe për udhëheqjen e Bashkimit Europian lidhur me Luftën në Ukrainë. Por krahas kritikave, kryeministri hungarez shprehu mbështetje të hapur për kandidatin republikan Donald Trump. Orban, vendi i të cilit aktualisht mban udhëheqjen e presidencës së BE-së, për vite të tëra ka pasur mospajtime me liderët e BE-së për shkak të shtypjes që Qeveria e tij i bën shoqërisë civile, mediave të pavarura dhe partive opozitare në Hungari. Përveç me BE-në, ai ka pasur përplasje edhe me NATO-n, veçmas për shkak të afërsisë së tij me presidentin rus, Vladimir Putin.