Qeveria e Viktor Orban ka nisur një "konsultim" popullor mbi pranimin e Ukrainës në BE: të gjithë votuesit po marrin një fletë votimi me postë për të vendosur mbi anëtarësimin e ardhshëm të Ukrainës në Bashkimin Evropian. Vota ka ngjyrat e një referendumi, por nuk ka vlerë ligjore; Orban e përdor rregullisht këtë metodë për të legjitimuar qëndrimet e tij euroskeptike. Në dritën e këtij votimi, qeveria po promovon gjithashtu një propagandë të pamëshirshme: postera gjigantë me foto të Ursula von der Leyen dhe Volodymyr Zelenskyt janë shfaqur nëpër rrugë: "Nuk do t'i lejojmë ata të vendosin për ne!", shkruhet në to. Në një letër drejtuar votuesve, Orban pretendon se "Brukseli po përshpejton anëtarësimin e Ukrainës pa marrë mendimin e popullit", ndërsa kjo do t'i shkaktonte dëme të mëdha Hungarisë, me rreziqe për fermerët, vendet e punës dhe pensionet. Sipas Orban, Ukraina nuk mund ta fitojë luftën kundër Rusisë dhe hyrja e saj në bllok do ta shkatërronte BE-në. Orban shpreson për mbështetje masive për të justifikuar qëndrimin e tij mbi këtë çështje në Bruksel, por ai shpreson gjithashtu të ketë një argument në luftën e tij të brendshme kundër kundërshtarit të tij të rrezikshëm, Peter Magyar, i cili mund ta mposhtë atë në zgjedhjet e vitit të ardhshëm. Nëse Bashkimi Evropian “do të kishte qenë siç është sot në vitin 2004, nuk është e sigurt se ne do t’i ishim bashkuar”, tha Orban. Duke komentuar qëndrimin aktual të Hungarisë, Orban nuk e përjashtoi mundësinë e daljes së Budapestit nga BE-ja, por shtoi: “Duhet të vendosim se kur do të vijë momenti për t’u larguar”. Sipas Kryeministrit, "dalja nga blloku duhet të ndodhë kur disavantazhet e anëtarësimit të jenë më të mëdha se avantazhet", dhe për momentin "kjo nuk ka ndodhur ende".