15 shtete federale të SHBA votojnë të martën për të përcaktuar sfidantin e presidentit Joe Biden, në nëntor. Ish-presidenti, Donald Trump që synon të kthehet për republikanët në Shtëpinë e Bardhë ka fituar ndërkohë cdo garë paraprake të partisë së tij deri më tani, përvec asaj në Uashington DC. Kandidatët e tjerë republikanë u larguan një nga një nga vgara dhe vetëm Nikki Haley vazhdon të luftojë. Nëse Haley nuk fiton gjatë super të martës, edhe ajo do të dalë nga gara. Tek demokratët ndërkohë, Joe Biden vazhdon të fitojë zgjedhjet paraprake, sepse nuk ka kandidatë që e rrezikojnë. Gjasat duken për përsëritjen e duelit të vitit 2020, Trump-Biden, por sipas sondazheve kjo nuk është perspektivë e mirë për votuesit amerikanë. Sipas një sondazhi në shkurt, shumica e të anketuarve e shohin si shumë moshuar, si Biden ashtu edhe Trump. Sidomos Biden, që tani presidenti më i moshuar i SHBA ka rënë në sy për shkak të harresave e disa ngatërrimeve gjuhësore. Fitorja e të dielës në Uashington DC, për Nikki Haleyn, ishte shumë domethënëse...por ajo mund të konsiderohet vetëm një sukses simbolik. Shanset e ish ambasadores amerikane të SHBA në Kombet e bashkuara, për të marrë nominimin republikan, mbeten të pakëta. Sipas sondazheve, ish-presidenti Trump do të vazhdojë të fitojë pothuajse të gjitha zgjedhjet paraprake. Humbja e Trump në Uashington DC, nuk është e para. Në zgjedhjet e fundit paraprake republikane në distriktin e Kolumbisë në vitin 2016, Trump fitoi më pak se 14 për qind të votave dhe asnjë delegat, megjithëse më vonë fitoi nominimin kombëtar. Ëashington DC është 100 për qind urban dhe një përqindje relativisht e lartë e banorëve kanë diplomë universitare. Shumë politikanë kryesorë republikanë - përfshirë Trump - e portretizojnë qytetin si të kontaminuar nga krimi dhe të sunduar nga elitat. Baza e Trump është në thelb rurale dhe veçanërisht e fortë në zonat me nivele të ulëta arsimore.