Fundjavën e shkuar oqeanet e botës ishin më të ngrohta se kurrë më parë, që nga fillimi i matjeve në vitin 1979. Sipas të dhënave të programit të BE-së Copernicus temperatura mesatare globale e sipërfaqes së deteve dhe oqeaneve arriti në 21,1 gradë Celsius. Studiuesit e klimës kanë mbetur të habitur veçanërisht nga koha e këtij rekordi. Zakonisht temperaturat e deteve dhe oqeaneve në mbarë botën janë më të larta në muajt mars dhe prill, pra pas verës në hemisferën jugore. Rekordi i mëparshëm prej 21,09 gradësh ishte regjistruar në mars të vitit 2024. Vlera e re rekord vjen pas një sërë rekordesh mujore dhe vlerash si jozakonisht të larta, që janë matur gjatë këtij viti. Sipas studiuesve, rekordi i ri vjen kryesisht si pasojë e ngrohjes globale të shkaktuar nga emetimet e gazeve që shkaktojnë efektin serrë, veçanërisht nga djegia e naftës, gazit natyror dhe e qymyrit. Temperaturat po rriten edhe më tej për shkak të fenomenit klimatik El Niño në Oqeanin Paqësor, i cili shfaqet një herë në disa vjet dhe shkakton temperatura veçanërisht të larta në rajonet tropikale. Rekordi i ri i temperaturave është një tjetër shenjë se oqeanet janë gjithnjë e më shumë nën presion. Me rritjen e temperaturave në det dhe oqeane, shtohen edhe rreziqet për banorët e zonave bregdetare dhe ekosistemet.