Komisioni i Ligjeve miratoi kërkesën e 49 deputetëve të Partisë Socialiste për fillimin e procedurave për shkarkimin e presidentit Ilir Meta. Janë 14 deputetë që kanë votuar pro dhe 1 i cili ka votuar kundër shkarkimit të kreut të shtetit, Ilir Meta. Me shumicë votash është miratuar ngritja e komisionit hetimor për shkarkimin e presidentit Meta. Deputeti Adriatik Alimadhi votoi kundër shkarkimit të Metës teksa deputetët opozitarë Zef Shtjefni dhe Alban Zeneli votuan pro. Ndërkohë që deputetët e komisionit të ligjeve votonin për shkarkimin e Metës, ky i fundit ka zgjedhur të mos jetë i pranishëm, duke vendosur datën 10 maj si ditën e vetme të përshtatshme në agjendën e tij presidenciale. Kryetati i komisionit të ligjeve e ka cilësuar vendosjen e datës 10 maj të kërkuar nga presidenti të qëllimshme për zhbërjen e kërkesës së 49 deputetëve, kjo pasi komisioni hetimor nuk mund të ngrihet katër muaj para mbarimit të mandatit të Kuvendit.