Policia e Shtetit ka marrë një sërë masash administrative për të garantuar rendin publik dhe ruajtjen e sigurisë gjatë zhvillimit të tubimit, të kërkuar nga Aleanca për Mbrojtjen e Teatrit më datë 21 maj. Policia e Shtetit njofton se duke nisur që prej orës 09:30 e në vijim, do të ketë bllokim të përkohshëm të qarkullimit të mjeteve, në bulevardin kryesor pranë Bashkisë së Tiranës. Për këtë arsye sugjerohet që të përdoren rrugë alternative, deri në përfundim të tubimit, si Unaza e Mesme dhe Unaza e Madhe. Në njoftimin e policisë thuhet se Drejtoria Vendore e Policisë Tiranë respekton plotësisht të drejtën e qytetarëve për të organizuar dhe marrë pjesë në tubime paqësore. Policia u përsërit edhe njëherë thirrjen organizatorëve, drejtuesve dhe pjesëmarrësve në tubime për të respektuar ligjin dhe për t'u distancuar nga aktet e dhunës.