Prej disa muajsh Parlamenti i Shqipërisë është futur në një qorrsokak, ku mungon debati publik, argumentimi e kundër-argumentimi. Nga njëra anë, grupi parlamentar i Partisë Demokratike kërkon me ngulm plotësimin e kërkesave të tyre, atë të ngritjes së komisioneve hetimore parlamentare si dhe riformatimin e Komisionit të Posaçëm për Reformën Zgjedhore, e nga ana tjetër, maxhoranca socialiste vijon të votojë projektligjet e saj në vetëm disa minuta, pa diskutim e debat konstruktiv. Në dukje krijohet imazhi i një lufte me mullinjtë e erës. Kreu i grupit të PS, referuar Komisioneve Hetimore është shprehur se maxhoranca nuk është kundër tyre, por problemi qëndron tek objekti i tyre, e për këtë topin e ka kaluar në fushën e Partisë Demokratike. Kjo e fundit vijon të këmbëngulë në miratimin e tyre paraprakisht e më pas rishikimin e objektit të hetimit.