Kryedemokrati Sali Berisha gjatë një bashkëbisedimi me qytetarët në rrjetet sociale këtë të shtunë, u ndal te reforma e re territoriale, duke e cilësuar si antikushtetuese dhe jashtë të gjitha parimeve ndërkombëtare të qeverisjes vendore. ‘Organizata kriminale e parlamentit shqiptar votoi jashtë çdo kondicioni ligjor dhe kushtetues, jashtë të gjitha parimeve ndërkombëtare të qeverisjes vendore, asgjësimin e 15 bashkive të vendit. Harta e qeverisjes vendore që paraqiti PD me 100 njësi plus, ishte harta më e studiuar, harta që jepte vërtet përgjigje shpopullimit masiv që po ndodh në Shqipëri. Kjo hartë e tmerroi Edi Ramën dhe ai jo vetëm që nuk pranoi këtë hartë, por asgjësoi edhe 15 bashki të tjera.’ Berisha hodhi poshtë pretendimet se opozita është palë me mazhorancën, duke thënë se qytetarët që mendojnë kështu i bëjnë një shërbim Ramës.