Shtetet e Bashkuara “shumë shpejt” do të ndërmarrin veprime tokësore ndaj trafikantëve të dyshuar të drogës nga Venezuela, tha presidenti amerikan, Donald Trump. “Ndoshta e keni vënë re se njerëzit nuk duan të dërgojnë ngarkesa përmes detit dhe ne do të nisim t’i ndalim ato edhe nga toka po ashtu. Toka është më e lehtë, ne do të fillojmë shumë shpejt”, tha Trump teksa po fliste përmes një lidhjeje video me anëtarë të shërbimit ushtarak amerikan. Ende nuk ka një reagim nga Venezuela për këtë njoftim të udhëheqësit amerikan. Administrata Trump ka peshuar opsione të lidhura me Venezuelën për të luftuar atë që e ka paraqitur si rolin e Nicolas Maduros në furnizimin me droga të paligjshme që kanë vrarë amerikanët. Maduro ka mohuar të ketë ndonjë lidhje me trafikun e paligjshëm të drogës. Forcat amerikane në rajon deri më tani janë përqendruar në operacione kundër narkotikëve, edhe pse fuqia e grumbulluar ushtarake është shumë më e madhe se ajo që nevojitet për këto operacione. Trupat amerikane kanë kryer të paktën 21 sulme ndaj anijeve të dyshuara për trafikim të drogës në Karaibe dhe në Oqeanin Paqësor që nga shtatori, duke vrarë të paktën 83 persona. Raportimet për një veprim të ri janë shtuar javët e fundit, pasi ushtria amerikane dislokoi trupa në Karaibe në kohën e përkeqësimit të raporteve mes SHBA-së dhe Venezuelës.