Prokuroria Speciale e Kosovës ka nisur një operacion në Komunën e Zubin Potokut, ku po zhvillohen procedura për zhvarrosjen, autopsinë dhe identifikimin e mbetjeve mortore. Zëdhënësja e Prokurorisë Speciale, Arbnora Luta, konfirmoi se veprimet po kryhen me kërkesë të Prokurorisë Speciale dhe në bazë të një urdhri të Gjykatës Themelore në Prishtinë. “Me kërkesë të Prokurorisë Speciale dhe urdhrit të Gjykatës Themelore në Prishtinë, institucionet relevante janë duke zbatuar urdhrin për zhvarrosje (ekshumim), autopsi dhe identifikim të mbetjeve mortore në një lokacion në Komunën e Zubin Potokut”, deklaroi Luta. Autoritetet nuk kanë dhënë ende detaje mbi identitetin e mundshëm të mbetjeve mortore apo arsyet e operacionit. Në terren ndodhen ekipet e Policisë së Kosovës dhe Institutit të Mjekësisë Ligjore, ndërsa operacioni po mbështetet edhe nga zyrtarë policorë të EULEX-it, të cilët po ofrojnë siguri gjatë zhvillimit të ekzaminimeve. Nën masa të rrepta sigurie, në zonë kanë hyrë edhe antropologët forenzikë, të cilët po kryejnë gërmimet dhe ekzaminimet në vendngjarje.