Sekretari amerikan i Mbrojtjes, Pete Hegseth, dhe të emëruar politikë në Pentagon kanë ushtruar presion që dy pjesëtarët e ekuipazhit të një avioni luftarak F-15, të rrëzuar mbi Iran në prill, të merrnin pjesë në një intervistë për emisionin e njohur të CBS, “60 Minutes”, raporton CNN duke iu referuar disa burimeve të njohura me çështjen. Sipas raportimit, të dy ushtarakët kishin shprehur fillimisht rezerva për daljen publike. Njëri prej tyre kishte ngritur madje shqetësimin se mund t’i kërkohej ose urdhërohej të merrte pjesë në intervistë, ndërsa zyrtarë ushtarakë druheshin se transmetimi mund të çonte në zbulimin e paqëllimshëm të detajeve të klasifikuara mbi operacionin e shpëtimit. Burimet e CNN pretendojnë se të emëruar politikë pranë Hegseth këmbëngulën fillimisht që të dy pjesëtarët e ekuipazhit të intervistoheshin. Megjithatë, pasi ushtarakët shprehën shqetësimet e tyre, Hegseth zhvilloi një takim privat me ta dhe i pyeti nëse dëshironin të merrnin pjesë, pa i detyruar. Sipas burimeve, zyrtarët politikë në zyrën e Hegseth këmbëngulën që të dy pjesëtarët e ekuipazhit të intervistoheshin. Zëdhënësi kryesor i Pentagonit, Sean Parnell, i ka mohuar kategorikisht pretendimet e raportuara nga CNN, duke i cilësuar ato “një gënjeshtër të plotë”. Sipas tij, vendimi për pjesëmarrjen në intervistë i përkiste vetëm secilit prej pjesëtarëve të ekuipazhit dhe Departamenti i Mbrojtjes kishte ndërmarrë masat e nevojshme për të garantuar që asnjë informacion i klasifikuar të mos bëhej publik. Megjithatë, episodi ka ngritur pikëpyetje mbi nivelin e përfshirjes personale të Hegseth në mënyrën se si operacionet ushtarake amerikane në Iran po i paraqiten publikut. Sipas CNN, sekretari i Mbrojtjes ka qenë i përfshirë në organizimin e intervistës së “60 Minutes” në një shkallë më të madhe nga sa konsiderohet e zakonshme për drejtuesin e Pentagonit.