Zyra Evropiane Kundër Mashtrimit, OLAF ka zbardhur skemën e eksportit të paligjshëm të mbetjeve të rrezikshme industriale nga porti i Durrsit, në Tajlandë. Hetimi filloi në vitin 2024 kur OLAF njoftoi autoritetet doganore shqiptare për një dërgesë të dyshuar se përmbante sasi të mëdha mbetjesh të rrezikshme të deklaruara gabim. Dokumentet e eksportit e përshkruanin ngarkesën si oksid hekuri. Megjithatë, analizat e mëvonshme laboratorike përcaktuan se ngarkesa, në fakt, përmbante një nënprodukt toksik të çelikut. “Ndërsa oksidi i hekurit përdoret gjerësisht në materialet e ndërtimit dhe metalurgjia dhe në përgjithësi konsiderohet jo i rrezikshëm kur trajtohet siç duhet, disa mbetje të çelikut klasifikohen si materiale të rrezikshme pasi ato shpesh përmbajnë përqendrime të larta të metaleve të rënda. Nëse menaxhohen ose asgjësohen në mënyrë të papërshtatshme, ato paraqesin rreziqe serioze për shëndetin dhe mjedisin, duke përfshirë ndotjen e tokës dhe ujërave nëntokësore dhe ekspozimin afatgjatë ndaj toksinave për komunitetet përreth. Ky ishte rasti me ngarkesën e identifikuar.” – njofton OLAF – duke shtuar se deklarimi i gabuar i mbetjeve të rrezikshme mbetet një nga metodat më të zakonshme të përdorura në trafikimin e paligjshëm të mbetjeve.