Kombet e Bashkuara kanë thënë se situata humanitare në Liban është më e keqe sesa gjatë luftës së fundit kundër Izraelit, 18 vjet më parë. “Situata humanitare në Liban i ka tejkaluar nivelet e ashpërsisë së luftës më 2006”, ka thënë Zyra e OKB-së për Ndihmë Urgjente të dielën. “Situata është përshkallëzuar sërish në ditët e fundit, ushtria izraelite është duke lëshuar urdhra për zhvendosje të banorëve nga Baalbek dhe Nabatieh, pak para se të sulmohen këto zona” – tha ajo. Zyra e OKB-së tha po ashtu se përveç të vdekurve, situata është vështirësuar edhe nga “shkatërrimi i infrastrukturës kritike, përfshirë kujdesin shëndetësor, meqë shumë spitale janë të mbingarkuara dhe kanë nevojë urgjentisht për gjak”. Lufta aktuale mes Izraelit dhe Hezbollahut nisi në tetor të vitit të kaluar. Hezbollahu, i mbështetur nga Irani, filloi të sulmojë Izraelin, si shenjë mbështetjeje për aleatin palestinez Hamasin. Hezbollahu dhe Izraeli shkëmbyen zjarr në kufi përgjatë një viti të tërë deri sa tel avivi nisi fushatën e tij në Liban, në fillim të tetorit, kur përplasja u përshkallëzua. Që nga fillimi i ofensivës izraelite, janë vrarë të paktën 2890 persona, sipas autoriteteve libaneze.