Zyrtarë të lartë nga Shtetet e Bashkuara, Ukraina dhe këshilltarët e sigurisë kombëtare nga Franca, Britania dhe Gjermania janë mbledhur për bisedime në Gjenevë për të diskutuar draftin e planit të Uashingtonit për t'i dhënë fund luftës në Ukrainë. I dërguari i posaçëm i SHBA-së, Steve Ëitkoff, dhe Sekretari i Shtetit, Marco Rubio, do të jenë të pranishëm në bisedimet mbi përfundimin e pushtimit rus, i cili tani është në vitin e katërt. Të premten, Presidenti amerikan, Donald Trump, tha se Presidenti ukrainas, Volodymyr Zelenski, kishte afat deri të enjten për të miratuar planin me 28 pika, i cili i bën thirrje Ukrainës të lëshojë territor, të pranojë kufizime në ushtrinë e saj dhe të heqë dorë nga ambiciet për t'u bashkuar me NATO-n. "Shpresojmë të sqarojmë detajet përfundimtare... për të hartuar një marrëveshje që është e favorshme për Ukrainën", tha një zyrtar amerikan. "Asgjë nuk do të vendoset derisa të takohen dy presidentët", duke iu referuar Trump dhe Zelenskit. Përpara nisjes së Rubio për në Gjenevë, Trump tha se propozimi i tij aktual për t'i dhënë fund luftës nuk është oferta e tij përfundimtare. Të dielën në mëngjes, autokolona automjetesh me targa diplomatike amerikane u panë duke kaluar nëpër Gjenevë, megjithëse nuk ishte menjëherë e qartë saktësisht se kur filluan bisedimet. Sekretari i Ushtrisë Amerikane Daniel Driscoll mbërriti në Gjenevë përpara bisedimeve. Delegacioni i Ukrainës udhëhiqet nga kreu i zyrës së Zelenskit, Andriy Yermak, dhe përfshin zyrtarë të lartë të sigurisë. Këshilltarët e sigurisë kombëtare nga Franca, Britania dhe Gjermania do të bashkohen në diskutime, së bashku me Bashkimin Evropian. Italia gjithashtu do të dërgojë një zyrtar, thanë burimet diplomatike. Kryeministri kanadez Mark Carney tha se do të flasë me Zelenskin më vonë në lidhje me planin e paqes. Udhëheqësit evropianë dhe zyrtarë të tjerë perëndimorë thanë të shtunën, se plani i paqes i SHBA-së, i cili mbështet kërkesat kryesore ruse, ishte një bazë për bisedimet për t'i dhënë fund luftës, por kishte nevojë për "punë shtesë", pasi ata kërkojnë një marrëveshje më të mirë për Kievin para eë enjtes. Një burim qeveritar gjerman tha se një draft i planit evropian të paqes, i cili bazohet në propozimin e SHBA-së, i ishte dërguar Ukrainës dhe administratës amerikane. Para bisedimeve, Presidenti Volodymyr Zelenskiy paralajmëroi se Ukraina rrezikonte të humbiste dinjitetin dhe lirinë e saj ose mbështetjen e Uashingtonit.