Organizata Botërore e Shëndetësisë ka miratuar sot për përdorim urgjent vaksinën kineze Sinovac, duke thënë se kjo vaksinë i plotëson të gjitha kriteret që lidhen me sigurinë dhe efikasitetin. “OBSH miraton përdorimin emergjent të vaksinës së kompanisë Sinovac, CoronaVac Covid-19, duke garantuar që plotëson standardet ndërkombëtare të sigurisë, efikasitetit dhe prodhimit”, shkruan ministrja Manastirliu. Sinovac është vaksina e parë e zhvilluar në një vend joperëndimor që ka marrë miratimin e OBSH-së. Kina tashmë ka vaksinuar disa miliona njerëz me këtë vaksinë, ndërsa ajo është shpërndarë edhe në dhjetëra vende të tjera. Një nga avantazhet kryesore të vaksinës Sinovac është se ajo mund të ruhet në një frigorifer standard, në 2 - 8 gradë Celsius, njësoj sikurse vaksina e kompanisë anglo-suedeze AztraZeneca. Ndërsa vaksina e prodhuesit amerikano-gjerman Pfizer duhet të ruhet në temperatura ekstremisht të ftohta: -70 gradë Celsius.