Organizata botërore e shëndetësisë, nuk ka nisur ende me shpërndarjen e vaksinave për vendet e varfra dhe ato me të ardhura mesatare, në kuadër të nismës Covax, por e ka miratuar tashmë një fond kompensimi për efektet e mundshme anësore të saj. Përmes planit të miratuar të kompensimit, për pretendime të efekteve anësore të vaksinës në 92 shtete të varfra që do të marrin vaksinat e covax-it, është zgjidhur kështu një shqetësim i madh për qeveritë pritëse. Programi, që OBSH thotë se është i pari dhe i vetmi mekanizëm kompensimi që operon në shkallë ndërkombëtare, do ti ofrojë pretenduesve një proces të shpejtë, të ndershëm dhe transparent. Pikëpyetje se si do të trajtoheshin pretendimet në rast të ndonjë efekti serioz anësor të vaksinës anti covid, që ekspertët presin të jenë të rrallë, kanë qenë shqetësuese për vendet që do të marrin dozat e vaksinës përmes skemës covax. Vendet që kanë financuar sasitë e veta të vaksinave, po ashtu planifikojnë edhe programet e tyre të kompensimit. Plani i OBSH ndërkohë, do të mbulojë efektet serioze anësore të lidhura me vaksinat që covax do të shpërndajë deri më 30 qershor 2022, në 91 vendet më të varfra, që përfshijnë kryesisht vende afrikane dhe të azisë juglindore.