Organizata Botërore e Shëndetësisë ka ngritur alarmin se në Afganistan janë drejt përfundimit ilaçet dhe pajisjet shëndetësore madje shumë shpejt institucionet mund të përballen edhe me mungesë të stafit mjekësor. Ky apel ka ardhur nga drejtori urgjencave të OBSH-së për rajonin e Mesdheut Lindor, Rick Brennan i cili ka bërë me dije se furnizimet përmes aeroportit të Kabulit nuk janë më një opsion për shkak të situatës sqë është krijuar së fundmi. OBSH-ja kishte planifikuar të bëjë furnizimet përmes transportit ajror por tashmë ato janë anuluar që pas marrjes nën kontroll të Kabulit nga ana e talebanëve. Ai theksoi se po shohin mundësinë e dërgimit të ndihmave mjekësore përmes aeroportit tjetër ,Mazar-i-Sharif, që gjendet në veri të Afganistanit. Ndërsa përsa I përket mungesës së stafit mjekësorë, zyrtari i OBSH-së tha se shumë prej tyre po ikin nga vendi, ndërsa një numër i grave që punojnë në këtë sektor nuk po paraqiten në punë, për shkak të frikës prej talibanëve.