Mbikëqyrësi bërthamor i OKB-së nuk ka asnjë të dhënë që të tregojë se sulmet izraelite dhe amerikane ndaj Iranit kanë goditur ndonjë objekt bërthamor, tha shefi i saj Rafael Grossi para Bordit të Guvernatorëve të agjencisë të hënën, pak çaste para se i dërguari i Iranit të thoshte se një objekt ishte shënjestruar një ditë më parë. Programi bërthamor i Iranit ka qenë ndër arsyet që Izraeli dhe SHBA-të kanë nisur sulmet, duke pretenduar se Irani po i afrohej shumë mundësisë për të bërë përfundimisht një bombë atomike. Në të njëjtën kohë, ajo që mbeti nga objektet bërthamore të Iranit pas sulmeve të qershorit të vitit të kaluar, duket se është kursyer në këtë fushatë deri më tani. "Nuk kemi asnjë të dhënë se ndonjë nga instalimet bërthamore është dëmtuar ose goditur", tha shefi i Agjencisë Ndërkombëtare të Energjisë Atomike. Se ku e bazonte ai këtë vlerësim është e paqartë, pasi Grossi tha gjithashtu se agjencia e tij nuk kishte qenë në gjendje të kontaktonte homologët e saj në Iran. Teherani nuk e ka lejuar Agjencinë të kthehet në objektet e tij të bombarduara që kur ato u sulmuan në qershor. "Përpjekjet për të kontaktuar autoritetet rregullatore bërthamore iraniane... vazhdojnë, por deri më tani nuk ka asnjë përgjigje. Shpresojmë që ky kanal i domosdoshëm komunikimi të rivendoset sa më shpejt të jetë e mundur", tha Grossi. Pak çaste më vonë, ambasadori i Iranit në agjenci, Reza Najafi, u tha gazetarëve se kompleksi bërthamor i Natanzit ishte sulmuar. Natanz strehonte dy uzina të pasurimit të uraniumit që u sulmuan në qershor, një mbi tokë që Agjencia ndërkombëtare bërthamore thotë se u shkatërrua dhe një nën tokë që të paktën u dëmtua.