Një 32-vjeçar shqiptar, i identifikuar si Adriano Bushi, u arrestua në Patra të Greqisë gjatë një operacioni të koordinuar të policisë greke. Bushi u lokalizua dhe u prangos në një banesë ku qëndronte përkohësisht në zonën e Ovryas. Sipas autoriteteve greke, ndaj tij ishte lëshuar një urdhër arresti nga Prokuroria e Shkallës së Parë të Akaisë për veprat penale të tentativës për vrasje me dashje dhe shkeljes së legjislacionit për armët dhe lëndët shpërthyese. Hetimet lidhen me një ngjarje të ndodhur më 7 prill 2026 në Patra. Sipas policisë, Bushi, së bashku me tre persona të tjerë, u takua me dy shtetas grekë pas një mosmarrëveshjeje. Në momentin që këta të fundit mbërritën në vendin e takimit, ndaj tyre u hap zjarr. Si pasojë e të shtënave, Panagiotis Moraitis mbeti i plagosur, duke pësuar plagë në të dy këmbët dhe frakturë të fibulës së majtë. Autoritetet greke vijojnë hetimet për zbardhjen e plotë të ngjarjes.