Një plagosje me armë zjarri është shënuar këtë të enjte në lagjen “Rus” të Shkodrës, ku Vladimir Bruçi është qëlluar pranë banesës së tij. Policia ka identifikuar autorin e dyshuar të ngjarjes, Pjerin Bitani, dhe po punon për kapjen e tij. Sipas autoriteteve, Bitani ka qëlluar dy herë në drejtim të Bruçit, ndërsa ngjarja dyshohet se ka ndodhur për motive banale. Sipas burimeve, autori dhe Bruçi janë fqinj. Ky i fundit është një emër i njohur për policinë për shkak të konflikteve të mëparshme. Më 3 qershor 2024, Vladimir Bruçi u dhunua me sende të forta në të njëjtën lagje nga gjashtë persona, pas një konflikti për një vend parkimi. Për këtë ngjarje, Gjykata e Shkodrës dënoi me burg tre prej autorëve. Izmir Sakica u dënua me 4 vite burg, dënim që me gjykim të shkurtuar u ul në 2 vite e 8 muaj, ndërsa Samuel Troshani dhe Arlind Kajoshi u dënuan me nga 16 muaj burg. Rreth tre muaj pas dhunimit të të atit, djali i Vladimir Bruçit, Alban Bruçi, qëlloi katër herë me armë zjarri drejt automjetit të Arlind Kajoshit, një prej personave të dënuar për dhunën ndaj babait të tij. Ndërkohë, policia vijon hetimet për zbardhjen e plotë të rrethanave të plagosjes së sotme dhe kapjen e autorit të dyshuar.