Një grua, e cila ishte raportuar e zhdukur nga familjarët mbrëmjen e kaluar, është gjetur e vdekur këtë të dielë, në lumin e Bardhë pranë urës së fshatit Grabanicë në Klinë. Policia për rajonin e Pejës bëri me dije se trupi u gjet pas kërkimeve intensive nga njësitë policore. Bëhet me dije se gruaja ishte shtatzënë. “Mbrëmë rreth orës 19:00, familjarët raportuan se viktima kishte dalë nga shtëpia dhe nuk gjendej. Rasti ishte regjistruar fillimisht si ‘person i zhdukur’. Sot gjatë kërkimeve, trupi i pajetë u gjet rreth një kilometër larg urës së fshatit,” thuhet në njoftimin e policisë. Sipas mediave në Kosovë, gruaja është gjetur e pajetë, ndërsa trupi është dërguar në Institutin e Mjekësisë Ligjore për të sqaruar rrethanat e vdekjes. Në vendin e ngjarjes kanë qenë të pranishëm edhe njësitë e zjarrfikësve për të ndihmuar në nxjerrjen e trupit. Policia dhe prokuroria kanë marrë të gjitha masat hetimore dhe vazhdojnë punën për të zbardhur plotësisht shkaqet e vdekjes.