Ushtria izraelite ka thënë të martën se ka nxjerr trupat e gjashtë pengjeve të marra prej militantëve të Hamasit më 7 tetor në jug të Izraelit, që edhe nxiti luftën në Gazë. Ushtria tha përmes një deklarate të martën se forcat e veta kanë nxjerrë trupat përgjatë një operacioni të zhvilluar gjatë natës në jug të Gazës. Ushtria tha se janë nxjerrë trupat e Yagev Bushtabit, Alexander Dancygut, Avraham Munderit, Yoram Metzgerit, Nadav Poplevellit, and Haim Perrit, pa sqaruar se kur apo si kanë vdekur ata. Ky operacion është kryer ndërsa Shtetet e Bashkuara, Egjipti dhe Katari po tentojnë të ndërmjetësojnë një armëpushim në mes të Izraelit dhe Hamasit, që mund të rezultojë me lirim të dhjetëra pengjeve të mbajtura prej Hamasit. Hamasi ende besohet se mban rreth 110 pengje që nga sulmi i 7 tetorit. Autoritetet izraelite vlerësojnë se rreth një e treta e tyre kanë vdekur. Si pasojë e sulmit të 7 tetorit, ushtria izraelite nisi ofensivën ushtarake në Gazë, me qëllim shkatërrimin e Hamasit. Më shumë se 40.000 palestinezë janë vrarë që atëherë, sipas autoriteteve lokale në Gaza.