Tre persona janë arrestuar në flagrancë, ndërsa dy të tjerë janë proceduar në gjendje të lirë pas një konflikti për motive pronësie që ndodhi në fshatin Dedaj të Pukës. Mendohet se te perfshiret ishin fqinje me njeri tjetrin dhe përkatësisht familjet Shkreli dhe Istrefi. Sipas Policisë, në pranga kanë rënë baba e bir nga Shkreli si dhe një 34-vjeçar nga familja Istrefi. Ndërkohë dy anëtarë të tjerë të familjes Istrefi janë vënë nën hetim në gjendje të lirë. Nga veprimet hetimore dyshohet se mbrëmjen e së martës, palët janë konfliktuar me njëra-tjetrën për motive pronësie, duke përdorur sende të forta dhe mjete prerëse. Si pasojë e përplasjes, kanë mbetur të dëmtuar dy persona, të cilët po marrin mjekim në Spitalin e Shkodrës dhe ndodhen jashtë rrezikut për jetën. Policia bëri të ditur se ka sekuestruar në cilësinë e provës materiale sendet dhe mjetet e dyshuara se janë përdorur gjatë konfliktit. Materialet procedurale i janë referuar Prokurorisë Shkodër, e cila po vijon veprimet për zbardhjen e plotë të rrethanave të ngjarjes.