Telekomi i Kosovës ka njoftuar konsumatorët se rënia e përgjithshme e shërbimeve prej mëngjesit të së martës, është shkaktuar si pasojë e vjetërsisë së pajisjeve. Përmes një komunikate për shtyp, Telekomi ka thënë se pajisjet do të zëvendësohen shpejt, pa përmendur afate kohore. Sipas kompanisë, ekipet e saj teknike janë duke punuar për të rikthyer shërbimet te qytetarët. Disa prej tyre janë ankuar në rrjetet sociale për mungesë shërbimesh. Telekomi i Kosovës është kompani publike, e transformuar në shoqëri aksionare, në të cilën operon telefonia fikse dhe ajo mobile, Vala. Operatori Vala ka mbi 1.2 milion konsumatorë në nivel vendi. Në këtë kompani janë të punësuar rreth 2.500 punëtorë. Telekomi i Kosovës dikur ka qenë kompania më fitimprurëse në Kosovë. Mirëpo, kohën e fundit është përballur me përkeqësim të situatës financiare. Kjo situatë, sipas ekspertëve të telekomunikacionit, ka ardhur si pasojë e kontratave të këqija, vendimmarrjes së gabuar, mungesës së investimeve, ndërhyrjes së politikës në vendimmarrje strategjike të kompanisë dhe nepotizmit. Telekomi i Kosovës i është nënshtruar dy herë procesit të privatizimit, mirëpo asnjëri prej tyre nuk është finalizuar me sukses.