Drejtori i Përgjithshëm i Policisë së Shtetit, Skënder Hita, ka pezulluar nga detyra katër punonjës të Policisë së Himarës, pas konstatimit të një objekti 5-katësh të ndërtuar pa leje në Qeparo. Nga detyra janë pezulluar nënkomisar Ferit Merkaj, komisar Emiljano Prenga, nënkomisar Klodjan Petani, si dhe inspektor Redin Çaushaj. Masa është marrë pasi në vendin e quajtur “Sugë”, në Qeparo, u konstatua një objekt me një kat nëntokë dhe katër kate mbi tokë, i ndërtuar pa leje. Pronari i objektit është arrestuar një ditë më parë, ndërsa tre punonjës të IMT-së Himarë, kryeinspektori dhe dy inspektorë, janë shpallur në kërkim për veprën penale “Shpërdorimi i detyrës”. Sipas verifikimeve paraprake, ndërtimi kishte nisur në dhjetor 2025, por nga Komisariati i Policisë Himarë nuk ishin marrë masa për parandalimin e tij dhe për vënien përpara përgjegjësisë ligjore të personit që kryente punimet. Për katër punonjësit e Policisë ka nisur edhe hetimi disiplinor.