Moska ka hedhur poshtë thirrjet për një armëpushim për Krishtlindje në Ukrainë. "Ne duam paqe, jo një armëpushim për t'i dhënë Ukrainës një pushim për t'u përgatitur për vazhdimin e luftës", tha zëdhënësi i Kremlinit Dmitry Peskov. "Tani pyetja është nëse jemi gati të arrijmë një marrëveshje paqeje apo jo, siç thotë Presidenti Trump", shtoi Peskov. Por nëse ukrainasit, në vend të një marrëveshjeje paqeje, synojnë "vendime të përkohshme dhe jopraktike, atëherë nuk ka gjasa të marrim pjesë në këtë", tha zëdhënësi i Putin. Peskov po ashtu konfirmoi se nuk ka patur asnjë telefonatë mes Donald Trump dhe Vladimir Putinit që nga ajo e raportuar më 16 tetor. Ai e bëri deklaratën pasi Trump tha një natë më parë se kishte folur së fundmi me udhëheqësin e Kremlinit. Pas bisedimeve në kryeqytetin gjerman Berlin mes të dërguarve të donald trump, presidentit ukrainas dhe liderëve të BE-së dhe NATO-s, u theksua se ishte arritur përparim pavarësisht se mbeteshin ende pika të pazgjidhura. Ukraina ka marrë garanci sigurie nga aleatët, me vendet kryesore të evropës që kanë treguar gatishmëri të dërgojnë trupa në vend pas një marrëveshjeje paqeje. Por perspektiva kundërshtohet nga rusia, me zëvendësministrin e jashtëm rus, Sergei Ryabkov që e ka përsëritur sërish. "Ne nuk do të mbështesim, nuk pranojmë dhe as nuk do të jemi të kënaqur me asnjë prani trupash të NATO-s në tokën ukrainase", tha ai duke theksuar se Moska nuk do të pranojë trupa të NATO-s në tokën ukrainase, edhe nëse ato janë pjesë e një garancie sigurie ose si anëtarë të Koalicionit të të Gatishmëve. Ryabkov më pas përsëriti se Rusia nuk ka ndërmend të bëjë lëshime për Donetskun, Luhanskun, Zaporizhian, Khersonin dhe Krimenë: "Ne absolutisht nuk mund të bëjmë kompromis për to." Sidoqoftë, zëvendësministri shprehu optimizëm, duke deklaruar se palët ishin "në prag" të arritjes së një zgjidhjeje diplomatike.