Policia e Tiranës procedoi këtë të hënë 31 protestues të tjerë. Ata janë të moshave të ndryshme ndërsa akuzohen për kryerjen e veprave penale “Organizimi dhe pjesëmarrja në grumbullime e manifestime të paligjshme”, “Prishja e qetësisë publike” dhe “Pengimi i qarkullimit të mjeteve të transportit”. Deri më tani policia ka proceduar një numër të madh nga ana e protestuesve, të cilët për 30 ditë po dalin në shesh duke kërkuar largimin e kryeministrit Edi Rama nga qeveria. Po ashtu mes kërkesave të tyre është dhe largimi i Sali Berishës si dhe i gjithë kastës së vjetër politike. Protesta nuk ka pasur incidente, ndërsa protestuesit pas qëndrimit para kryeministrisë nisin në fund një marshim për disa orë në disa prej akseve kryesore të kryeqytetit.