Kryeministrja daneze Mette Frederiksen tha se “nuk mund të spiunosh një aleat” pas raportimeve se Shtetet e Bashkuara kanë mbledhur të dhëna inteligjence për Grenlandën, një territor gjysmë-autonom danez i shumë-dëshiruar nga Presidenti amerikan Donald Trump. Komentet e Frederiksen të premten janë të fundit në përplasjen mes Danimarkës, Grenlandës dhe Shteteve të Bashkuara sepse Trump kërkon të aneksojë ishullin strategjik Arktik. Danimarka dhe Grenlanda këmbëngulin se ishulli i pasur me minerale nuk është në shitje, ndërsa Trump nuk e ka përjashtuar marrjen e tij me forcë ushtarake edhe pse Danimarka është një aleate e NATO-s. Kryeministrja daneze foli pasi Danimarka thirri diplomatin më të lartë amerikan në vend për të dhënë shpjegime pas një raporti të Ëall Street Journal, i cili tha se disa zyrtarë të lartë nën drejtimin e drejtoreshës së inteligjencës kombëtare të SHBA-së, Tulsi Gabbard, kishin udhëzuar krerët e agjencive të inteligjencës të mësonin më shumë rreth lëvizjes së pavarësisë së Grenlandës dhe qëndrimit të vendasve mbi mundësinë e shfrytëzimit të burimeve të ishullit nga SHBA. Frederiksen tha të premten se bëhej fjalë thjeshtë për "thashetheme" në një gazetë ndërkombëtare. Ëall Street Journal citoi ndërkohë dy burime të njohura me përpjekjet e SHBA-së, të cilët nuk i identifikoi. "Bashkëpunimi në lidhje me mbrojtjen, parandalimin dhe sigurinë në pjesën veriore të Evropës po bëhet gjithnjë e më i rëndësishëm," tha Frederiksen. "Sigurisht, nuk mund të spiunosh një vend aleat". Kryeministri i Grenlandës, Jens-Frederik Nielsen, tha në anën tjetër se raportet për spiunazh janë të papranueshme dhe mungesë respekti.