Kryeministri i Shqipërisë, Edi Rama, ka thënë se Shqipëria, Serbia e Maqedonia e Veriut, vendosën të ndërmerrnin iniciativën “Ballkani i Hapur” pasi nuk mund të prisnin më Bashkimin Evropian. Sipas mediave serbe, në një fjalim online të mbajtur në një panel politik në kuadër të konferencës “Ballkani i Hapur” në Kuvendin e Serbisë, Rama tha se ekonomitë e rajonit kanë pritur prej kohës për këtë iniciativë. Sipas tij, kjo do të mundësojë një zhvillim më të shpejtë ekonomik të tri vendeve përmes hapjes së kufijve për mallrat, shërbimet, njerëzit dhe kapitalet. Rama i ka dërguar një mesazh vendeve të rajonit që nuk duan të Bashkohen me Ballkanin e Hapur, duke thënë se nuk duhet humbur kohë për të bindur ekonomitë tjera në rajon. Ai ka kritkuar po ashtu edhe Bashkimin Europian, duke thënë se Ballkani nuk mund të rrijë duarkryq. “Nuk mund të presim as BE-në, ata mund të premtojnë diçka, nuk e përmbushin dhe prapë ta premtojnë.Varet nga ata. Ne nuk mund të presim më, duhet të ecim para”, ka thënë Rama.