Ish-kryetarja e Dhomës së Përfaqësuesve, Nancy Pelosi, i tha privatisht Presidentit Joe Biden në një bisedë të fundit se sondazhet tregojnë se presidenti nuk mund ta mposhtë Donald Trumpin dhe se Biden mund të shkatërrojë shanset e demokratëve për të fituar Dhomën e Përfaqësuesve në nëntor, nëse ai vazhdon të kërkojë një mandat të dytë, sipas katër burimeve të njohur me bisedën. Presidenti u përgjigj duke i thënë Pelosit se ai ka parë sondazhe që tregojnë se ai mund të fitojë, tha një prej burimeve. Sipas tij, Biden u vendos në pozicion mbrojtjeje në lidhje me sondazhet. Në një moment, Pelosi i kërkoi Mike Donilon, këshilltarit për një kohë të gjatë të Bidenit, të jepte informacionet më të fundit mbi të dhënat e sondazheve. Kjo bisedë, është e dyta e publikuar nga mediat amerikane, mes Pelosit dhe Bidenit, që nga debati katastrofik i 27 qershorit. Ndërsa data e saktë e bisedës nuk ishte e qartë, një burim tha se ajo është zhvilluar javën e kaluar. Pelosi dhe Biden kishin folur po ashtu edhe në fillim të korrikut. Asnjë nga burimet nuk tha ndërkohë nëse Pelosi i kërkoi Bidenit në këtë bisedë që të largohet. Pelosi i ka kaluar javët pas debatit duke dëgjuar shqetësimet e kolegëve të saj. Ajo bëri bujë kur tha në një intervistë javën e kaluar se “I takon presidentit të vendosë nëse ai do të kandidojë. Ne të gjithë po e inkurajojmë atë që të marrë atë vendim, sepse koha po kalon”. Kur u pyet për koment, zëdhënësi i Shtëpisë së Bardhë, Andreë Bates nuk iu përgjigj pyetjes së CNN.