Hetuesit kanë kontrolluar të premten vendngjarjen e njërës prej tragjedive më të mëdha ajrore në Indi, për të gjetur shkaktarin e rrëzimit të avionit Air India. Ndërkohë, kryeministri indian, Narendra Modi, u takua me pasagjerin e vetëm që mbijetoi, një ditë pasi avioni u rrëzua pak minuta pasi ishte ngritur nga pista, duke lënë të vdekur 241 njerëz në bord dhe disa të tjerë në tokë. Avioni Boeing 787, që po fluturonte për në Londër, goditi një konvikt të një kolegji mjekësor në një zonë banimi në qytetin veriperëndimor të Ahmedabadit, pak minuta pasi u ngrit në ajër të enjten. Shumica e trupave ishin djegur deri në atë shkallë sa nuk njiheshin më, ndërsa autoritetet po kryejnë teste të ADN-së për identifikimin e viktimave. Pritet të gjenden më shumë trupa gjatë kërkimit në vendin e aksidentit. Nuk dihet nëse kutitë e zeza, regjistruesit e të dhënave të fluturimit dhe të zërit në kabinë, janë gjetur. “Të gjithë jemi të tronditur nga kjo tragjedi ajrore në Ahmedabad. Humbja e kaq shumë jetëve në mënyrë kaq të papritur të lë pa fjalë”, tha Modi në rrjetet sociale pas vizitës në vendngjarje. “Ne e kuptojmë dhimbjen e tyre dhe e dimë që boshllëku i krijuar do të ndihet për vite me radhë”. I mbijetuari i vetëm i aksidentit u takua me Modin në spitalin qeveritar ku po trajtohet për djegie dhe lëndime të tjera. Vishëaskumar Ramesh i tha transmetuesit kombëtar të Indisë se ende nuk mund të besojë që është gjallë. Ai tha se avioni dukej sikur ishte bllokuar në ajër disa sekonda pas ngritjes. Dritat e gjelbra dhe të bardha u ndezën dhe avioni dukej se nuk mund të ngrihej lart. Ramesh tha se ana e avionit ku ai ishte ulur ra mbi katin e parë të një ndërtese dhe kishte hapësirë që ai të shpëtonte pasi dera u hap. Ai hoqi rripin e sigurisë dhe doli nga avioni. “Kur hapa sytë, kuptova që isha gjallë”, tha ai. Bordi i Hetimit të Aksidenteve Ajrore të Indisë po heton, dhe pritet që në hetim të marrin pjesë edhe përfaqësues nga Bordi i Sigurisë së Transportit Kombëtar të SHBA-së, Administrata Federale e Aviacionit, Boeing dhe General Electric. Mjekët po kryejnë teste ADN-je për identifikimin e viktimave. Dy mjekë në spital thanë se trupat e katër studentëve mjekësorë të vrarë në tokë pas rrëzimit të avionit iu dorëzuan familjeve të tyre. Ata thanë se të paktën 30 studentë të tjerë të plagosur ishin ende në spital dhe të paktën katër prej tyre janë në gjendje kritike.