Në seancën e kësaj të enjteje për dosjen “Metamorfoza”, biznesmeni Pëllumb Gjoka hodhi poshtë akuzat e SPAK, duke pretenduar se ato mbështeten vetëm te komunikimet e Sky ECC dhe jo te prova konkrete. Gjoka tha para gjykatës se nuk ka qenë përdorues i platformës Sky ECC, por shtoi se edhe nëse merret si e mirëqenë se ai ka qenë përdorues dhe se identifikimi i kodeve është i saktë, sërish bisedat e paraqitura nga prokuroria nuk provojnë përfshirjen e tij në ngjarjet për të cilat akuzohet. Duke iu drejtuar togave të zeza, ai tha se nëse gjendet qoftë dhe një bisedë e tij me Ervis Martinajn, është i gatshëm të pranojë të gjitha akuzat e ngritura. Biznesmeni sfidoi SPAK-un të paraqesë qoftë edhe një komunikim të vetëm me Behar Bajrin apo persona të tjerë ku flitet për vrasjen e Gjin Ndoit, lëvizjen e autorëve apo ndonjë rol të tij në ngjarje. Po ashtu, ai mohoi çdo lidhje me vrasjen e Genc Tafilit, duke deklaruar se emri i këtij të fundit nuk përmendet asnjëherë në komunikimet që prokuroria pretendon se janë të tijat.